• MONDRAGON Korporazioaren zentro teknologikoak eta BRTAko kideak 400 pertsona baino gehiagoko taldea osatu zuten.
  • Arrasateko zentroak 4 milioi euro baino gehiago inbertitu zituen ekipamenduan, azpiegituretan eta langileen prestakuntzan.
  • Urteko mugarrien artean DIGILAB jarri da martxan, Estatuko teknologia digitalen laborategi aurreratuena.

Testuinguru ekonomiko global konplexu baten erdian, eta ziurgabetasunak markatuta, IKERLAN zentro teknologikoak maximo historikoa lortu zuen 2022an; guztira 28 milioi euroko diru-sarrerak izan zituen, eta enpresen fakturazioa nabarmen handitu zen. Bigarren urtez jarraian, industriaren lehiakortasunerako funtsezkoak diren esparruetan (zibersegurtasuna, adimen artifiziala, robotika eta automatizazio industriala edo energia elektrikoaren metaketa) teknologia-transferentzia arloa bi digitu hazi zen, 13,8 milioi euroraino, 2021ean baino % 11,2 gehiago.

Era berean, joan den ekitaldian, IKERLANek mugarri historiko bat ezarri zuen pertsonen arloan, 400 pertsona baino gehiagoko taldea finkatuz, eta inbertsio handia egin zuen ekipamenduan, azpiegituretan eta prestakuntzan. Guztira, 4 milioi euro inbertitu zituen, eta, horri esker, bere espezializazio-alorretan erreferentzia-zentro gisa duen posizionamenduari eutsi jarraitu ahal izan zion. Inbertsioen artean, hauek nabarmendu ziren: DIGILAB abian jartzea, Estatuko azken belaunaldiko teknologia digitalen laborategi bakarra (mugikortasun elektrikoaren eta energiaren esparruan aplikazioetarako bereziki diseinatutako potentzia-elektronikako laborategi aurreratu berria) eta juniorren harrobiaren eta ikertzaileen prestakuntzaren aldeko apustua (50 doktore-tesi aktibo eta gradu- eta master-amaierako 60 lan baino gehiago, 12 unibertsitaterekin lankidetzan eginak).

Emaitza horien berri eman da IKERLANek gaur Arrasateko Amaia Antzokian egin duen urteko batzarrean.

Bere hitzaldian, erakundeko zuzendari nagusi Ion Etxeberriak nabarmendu zuenez, “2022 urte oso positiboa izan da IKERLANentzat; izan ere, hazkunde handia izan dugu, batez ere enpresetarako transferentziaren ikuspegitik; azken batean, gure xede nagusia eta izateko arrazoia da hori. Enpresekin egindako kontratuen fakturazioa globalaren erdia baino gehiago da, eta horrek esan nahi du gure plan estrategikoarekin koherenteak garela eta enpresei teknologia- eta merkatu-erronketan laguntzen jarraitzen dugula. Zalantzarik gabe, enpresek eta erakundeek IKERLANen duten konfiantza dela eta, lanean jarraitu behar dugu talenturik onena erakartzeko, enpresei zerbitzurik onena eskaintzeko eta herrialdearentzat etorkizun hobea eraikitzeko.”

Transferentzia puntako sektoreetan

2022an, 28 milioi euro fakturatu zituen IKERLANek, 2021ean baino % 12 gehiago. Aurreko ekitaldiko alderdirik aipagarrienetako bat izan zen enpresekin egindako transferentzia-jarduerengatik lortutako kopurua; hau da, 13,8 milioi euro. Datu horiek fakturazio osoaren % 52 inguru egiten du, eta arlo hori % 11,2 hazi da 2021ekin alderatuta; urte horretan, % 12,5eko igoera nabarmena izan zuelarik.

Hauek izan dira zentroaren jarduera-sektore nagusiak: garraioa eta mugikortasuna (% 43), fabrikazio aurreratua (% 19) eta energia (% 14). Halaber, ORONA, CAF, ULMA, ORKLI, FAGOR eta JEMA bezero garrantzitsuak izan dira ingurune hurbilenean, baita GENERAL ELECTRIC, AMAZON AWS, ACCENTURE multinazionalak ere. Urtean zehar, zentroak 170 enpresa baino gehiagorekin egin du lan (horietatik % 51 ETEak), 600 proiektutan baino gehiagotan.

Talentua erakartzea eta prestatzea

Pertsonei dagokienez, 2022 urte giltzarria izan da zentro teknologikoarentzat ere, 400 pertsonako zifra esanguratsua lortu baitzen. Etxeberriak lantaldea finkatzeari buruz hitz egin du, eta nabarmendu du, “egungo egoera konplexua den arren, oro har urte positiboa izan dela langileen erakarpen, fidelizazio eta sendotzearen ikuspegitik, batez ere gure harrobitik lortutako emaitzei, kanpoko talentua sartzeari (langileen % 30) eta lan-malgutasuneko neurriak garatzeari esker”. Ildo horretan, Etxeberriak IKERLANen hiru egoitzetan (Arrasaten, Hernanin eta Bilbon 2023aren hasieratik) malgutasunaren alde egindako apustua nabarmendu du, baita pertsonen kontziliazioa eta ongizatea sustatzera bideratutako telelanaren baldintzak zabaltzea ere.

Abangoardia zientifiko-teknologikora

Horrez gain, 12,9 milioi euroko diru-sarrerak izan zituen IKERLANek ikerketa-programa publikoetan, eta, horri esker, teknologia lortzeko eta garatzeko jarduerak indartzen jarraitu du, gero enpresei transferitzeko. Diru-sarrera horien % 24,9 Eusko Jaurlaritzak bultzatutako programetatik etorri zen, % 20,4 Europako hainbat erakundek sustatutako ekimenetatik eta % 3 Estatuko Administrazio Orokorrak eta Gipuzkoako Foru Aldundiak finantzatutako proiektuetatik.

2022an, IKERLANek 79 ikerketa-proiektutan lan egin zuen, eta Europako 10 proiekturen buru izan zen, besteak beste, energia eolikoa (INNTERESTING), software kritikoaren urruneko eguneratzea (UP2DATE), adimen artifizialean oinarritutako ikusmen-sistemak (NIMBLE AI) eta mugikortasun elektrikorako bateriak (LIBERTY).

Aktiboen balorizazioa

Urte bikainaren amaiera gisa, 2022an IKERLANek zibersegurtasunaren esparruan spin off berri bat sortzeko oinarriak ezarri zituen. Enpresa hori 2023an sortu zen ORBIK CYBERSECURITY izenarekin. ORBIK CIBERSECURITY sortu da IEC-62443rekin bat datozen ebaluatzeko eta produktu industrial elektronikoetako ahultasunak aztertzeko zerbitzu aitzindariak eskaintzeko, eta gaian erreferentea izan nahi du Europako hegoaldean.

IKERLANi buruz

IKERLAN zentro aitzindaria da teknologia-transferentzian eta lehiakortasun-balioak industriari egiten dion ekarpenean. Soluzio integralak eskaintzen ditu, bi arlo nagusitan arlo teknologiko desberdinak konbinatuz: Elektronika, Informazio eta Komunikazio Teknologiak (EIKT) eta Energia eta Mekatronika. Gaur egun, 400 lagunek osatzen dute zentro teknologikoko taldea, eta egoitzak ditu Arrasaten, Donostialdean eta Bilbon. MONDRAGON Korporazioko eta Basque Research and Technology Allianceko (BRTA) kooperatiba kide den aldetik, IKERLANek enpresa-eredu jasangarria, lehiakorra eta etengabe eraldatzen ari den ereduan oinarritzen da.

Miniatura
2022an, IKERLANen enpresei fakturazioa % 11 baino gehiago hazi zen, diru-sarreren erdia baino gehiago izanik, eta zentro teknologikoak transferentzia-proiektuetan duen lidergoa sendotuz.
Miniatura
seo-url
ikerlanek-bere-fakturazioa-handitu-du-enpresekin-egindako-proiektuei-esker-eta-diru-sarrera-historikoak-lortu-ditu
Id Externo
NOTA-239