• Ekitaldia mundu mailako erreferentzia da arlo horretan, eta Montrealen egin da irailaren 20tik 24ra bitartean
  • IK4-IKERLANek lau ponentzia eskaini ditu, enpresekin eta unibertsitateekin elkarlanean landu dituen garapenak azaltzeko

IK4-IKERLAN hizlaririk nabarmenenetakoa izan da potentziako elektronikaren eremuan munduan erreferentziazko den ekitaldi nagusietako batean, Energy Conversion Congress and Exposition (ECCE) ekitaldian, joan den irailaren 20tik 24ra bitartean, Montrealen (Kanada).

Biltzarrean, zentroak bere aurrerapenak partekatu ditu komunitate zientifikoarekin, potentziako elektronikari eta energiaren kudeaketari lotuta, eta bere ahalmenak erakutsi ditu, gai horietan landutako garapen zehatzen bitartez. Halaber, IK4-IKERLANek aurrerapenak identifikatu ahal izan ditu interesatzen zaizkion hainbat gairi buruz, eta harremanak sendotu ditu bertan ziren unibertsitate eta enpresekin.

Zentroak rol garrantzitsua jokatu du ekitaldian, potentziako elektronikan punta-puntan kokatuta baitago eta merkatutik oso hurbil diharduelako; horren ondorioz, programako lau hitzalditan parte hartu ahal izan du. Horietan, berarekin lankidetzan diharduten unibertsitate eta enpresekin egindako garapenak aurkeztu ditu.

Ponentziak

Energia biltegiratzearen arloan, IK4-IKERLANek hitzaldi bat eman du biltegiratze sistemen bigarren bizitzaren azterketari buruz, energia berriztagarrien integrazioan erabiltzeko. Lan hori Abengoa enpresarekin eta Danimarkako Aalborgeko unibertsitatearekin batera egin du.

Bateriak kudeatzearen arloan, hitzaldia eskaini du planta fotovoltaiko adimendunak kudeatzeko estrategiei buruz; horiek energia biltegiratzeko sistemak integratzeko ahalmena dute, sare elektrikoan hobeto integratzeko eta, ondorioz, energia berriztagarrien potentziala gehiago aprobetxatzeko.

Azkenik, garraioari dagokionez, zentroak bi ponentziatan partekatu du bere jakintza: bat potentzi bihurgailuen garapenari zuzenduta zegoen, silizio karburozko erdieroale berrietan oinarrituta, energia kontakturik gabe transferitzeko; eta bestea, zeina CAFeko ordezkariekin landu duen, energiaren kudeaketari buruzkoa izan da, biltegiratzeko sistema ontziratuak dituzten tranbietarako.

“Aukera paregabea”

“Protagonismo hori izatea aukera paregabea izan da guretzat, komunitate zientifikoari eta enpresarialaren aurrean IK4-IKERLANen garatu ditugun azken aurrerapenak erakusteko”, adierazi du Unai Viscarret ikertzaileak. “ECCEn izan dugun presentziari esker, halaber, potentziako elektronikan dauden azken joerak zein diren ikusi ahal izan dugu, eta hori oso garrantzitsua da zentroarentzat”, gaineratu du.

ECCE 2015i buruz

ECCE 2015 munduko topaketarik garrantzitsuenetakoa da energiaren bihurketaren arloan, eta irailaren 20tik 24ra bitartean egin da Montrealen, Kanadan. Aurtengoa Power Electronics Societyk (PELS) eta Industry Application Societyk (IAS) antolatzen duten ekitaldiaren zazpigarren edizioa izan da.

Munduan potentziako elektronikaren arloan diharduten enpresa, ikerketa zentro eta unibertsitate nagusiek erantzun diote hitzorduari, gaur egungo egoerari buruzko informazioa partekatzeko eta joera berriei buruz eztabaidatzeko.

Ekitaldian potentziako elektronikaren inguruko figura nagusiak elkartu dira, eta IK4-IKERLAN izan da espainiar estatutik joandako partaide gutxietako bat.

IK4-IKERLANi buruz

IK4-IKERLAN zentro liderra da teknologiaren transferentziari eta enpresei balio lehiakorra emateari dagokionez, hainbat domeinu teknologiko konbinatuz soluzio integralak eskaintzeko ahalmena baitu. Hori posible izateko arrazoia da sei esparru handitan espezializazio maila handia duela: sistema txertatuak, potentziako elektronika, mikroteknologiak, energiaren eraginkortasuna eta biltegiratzea, mekatronika eta fabrikazio aurreratua.

Miniatura
Zentroa ECCE 2015eko hizlari nabarmenetakoa izan da
Miniatura
seo-url
ik4ikerlanek-bere-aurrerapenak-aurkeztu-ditu-kanadan-potentziako-elektronikaren-arloan
Id Externo
NOTA-87