Mugikortasun autonomoak datozen hamarkadetan hiriak eraldatuko ditu. Hala ere, ibilgailu autonomoek modu seguruan zirkulatu ahal izateko, beren inguruan gertatzen dena hautemateko gai izateaz gain, elkarren artean eta hiri-azpiegiturarekin lankidetzan aritzeko gai izan beharko dute.

Helburu horrekin sortu da MIMISTIC, Bizkaiko Foru Aldundiak bultzatutako ekimena, Bilbon mugikortasun adimendun seguruagoa, arinagoa eta inklusiboagoa ahalbidetuko duten teknologiak garatu nahi dituena. Proiektuaren helburua da mugikortasunaren balio-kate osoari maniobra kolaboratibo sendo eta eraginkorrak egiteko aukera emango dieten irtenbide aurreratuak eskaintzea, pertsonen segurtasuna eta hiriko trafikoaren kudeaketa hobetuz.

Testuinguru horretan, IKERLANek pertzepzio kooperatiboko teknologiak ikertzen ditu; gaitasun horrek ibilgailuei, azpiegitura adimendunei eta hiri-kudeaketako sistemei hirian gertatzen denari buruzko informazioa denbora errealean partekatzea ahalbidetuko die. Horri esker, ibilgailu autonomoek beren inguruaz ikuspegi askoz zabalagoa izango dute eta erabaki seguruagoak eta eraginkorragoak hartu ahal izango dituzte.

IKERLANek egiten duen ikerketak, Bilbo mugikortasun-eredu berri baterantz bultzatu nahi du, non ibilgailuak, semaforoak, hiri-sentsoreak eta trafikoa kudeatzeko zentroak denbora errealean elkarlanean aritzeko gai den ekosistema konektatu baten parte izango diren. Helburua da joan-etorri seguruagoak lortzea, gorabeherak murriztea eta herritar guztientzat, bereziki bide publikoko erabiltzailerik ahulenentzat, mugikortasun eskuragarriagoa sustatzea.

Ibilgailuek elkarlanean aritzeko eta erabaki hobeak hartzeko teknologiak

IKERLANek MIMISTIC proiektuan egiten duen ikerketak adimen artifiziala, pertzepzio-sistemak eta komunikazio aurreratuak uztartzen ditu, ibilgailuek (autonomoak, automatizatuak edo arruntak izan), azpiegiturek eta kontrol-zentroek denbora errealean elkarlanean aritu ahal izan dezaten.

Zentro teknologikoaren jarduerak lau arlo nagusitan zentratzen dira:

• Ibilgailu adimendunagoak eta konektatuagoak, informazioa trukatzeko eta zerbitzu digitaletara modu seguru eta eraginkorrean sartzeko gai direnak, energia-kontsumoa optimizatuz eta mugikortasun jasangarriagoa bultzatuz.
• Pertzepzio sendoko sistema aurreratuak, oztopoak, oinezkoak eta arriskutsuak izan daitezkeen egoerak hobeto detektatzeko gai direnak, ikuspen murriztuko bidegurutzeak, trafiko-dentsitate handiko eremuak edo eguraldi txarreko baldintzak bezalako eszenatoki konplexuetan ere.
• Gidatze autonomoko gaitasun berriak, ingurune dinamikoetara eta euri handia, lainoa edo zoru irristakorra bezalako baldintza txarretara egokitzeko gai den adimen artifizialean oinarrituak.
• Ibilgailuen arteko komunikazio erresilienteak, informazioa ibilgailuen eta azpiegituren artean modu azkar, fidagarri eta seguruan igarotzen dela bermatzeko diseinatuak.

Ikerketa hauek IKERLANek garatutako PreAIdictive Safety kontzeptuaren barruan kokatzen dira; kontzeptu horrek segurtasun-sistemen belaunaldi berri bat proposatzen du, ikusmen artifiziala, komunikazio adimendunak eta adimen artifiziala konbinatuz arriskuak gertatu baino lehen aurreikusteko gai izango dena.

Bilbon mugikortasun adimenduna bultzatzeko ekosistema bat

MIMISTICen helburua da mugikortasun seguruagoa, eraginkorragoa eta jasangarriagoa ahalbidetuko duten oinarri teknologikoak ezartzea, eta Bilbo Europako erreferente bihurtzea mugikortasun konektatu eta autonomoan, ibilgailuek eta azpiegiturek denbora errealean elkarlanean aritzeko aukera emango dieten teknologiei esker.

Garapenak merkatuaren benetako beharrei erantzuten dietela ziurtatzeko, proiektuak Advisory Board bat du, CAF, Kapsch, ASIMOB, Gertek, AIC eta BFA bezalako erreferentziazko erakundeek osatua, eta horiek sektoreko ezagutza eta merkatuaren ikuspegia eskaintzen dute emaitzen transferentzia bizkortzeko.

MIMISTICen parte-hartzearen bidez, IKERLANek bere posizionamendua indartzen du mugikortasun adimenduneko teknologietan, adimen artifizialean, komunikazio aurreratuetan eta segurtasunezko sistema autonomoetan, etorkizuneko mugikortasunaren erronkei aurre egiteko prest dagoen Bilbo seguruago eta inklusiboago bat eraikitzen lagunduko duten irtenbideen garapenari ekarpena eginez.

IKERLANek Bizkaiko Foru Aldundiak bultzatutako MIMISTIC proiektuan parte hartzen du, ibilgailuek eta azpiegiturek denbora errealean informazioa partekatu dezaten eta maniobra kolaboratibo seguruagoak eta eraginkorragoak egin ditzaten teknologia aurreratuak garatzeko.