options
search icon
email icon
EU
rrss gif icons
twitter icon
linkedin icon youtube icon

Unibertsitatea-Enpresa-Gizartea UPV/EHU - IKERLAN Ikasgela sortu da, Euskadik teknologia disruptiboetan dituen gaitasunak indartzeko

shape

Euskal Herriko Unibertsitateak eta IKERLANek akordio bat sinatu dute sortzen ari diren ikerketa-esparruetan lankidetza sustatzeko, hala nola zibersegurtasunean, robotikan, adimen artifizialean edo konputazio kuantikoan.

Unibertsitatea-Enpresa-Gizartea UPV/EHU - IKERLAN Ikasgela sortu da, Euskadik teknologia disruptiboetan dituen gaitasunak indartzeko

19/01/2024

shape
  • Ekimen honek teknologia berritzaileetan espezializatutako prestakuntza-esparru bat eskainiko die ikasleei, enpresa-errealitatera eta ondorengo trantsizio batera bideratua.

UPV/EHUren eta IKERLAN-en arteko hitzarmena sinatuta, ostegun honetan, urtarrilaren 18an, Unibertsitatea-Enpresa-Gizartea UPV/EHU IKERLAN Ikasgela jarri da martxan. Eva Ferreira errektoreak eta Ion Etxeberria IKERLANeko zuzendari nagusiak sinatu dute dokumentua.

Arrasaten egindako ekitaldian, IKERLANen instalazioetan, Guillermo Quindós UPV/EHUko Garapen Zientifiko-sozialeko eta Transferentziako errektoreordea, Charles Pinto UPV/EHUko Bilboko Ingeniaritza Eskolako zuzendaria eta Eduardo Jacob Bilboko Ingeniaritza Eskolako katedraduna eta Ikasgelako zuzendaria ere izan dira. Ondoan izan dituzte Josu Bilbao, IKERLANeko Teknologia Digitalen eta Adimen Artifizialaren zuzendaria, Unai Viscarret, Pertsonen eta Komunikazioaren zuzendaria, eta Ana Isabel Martínez eta Aron Pujana, Ezagutza Zuzendaritzako kideak. Sinatu ondoren, IKERLANen egoitza nagusiko laborategiak bisitatu dira, Arrasaten.

Hitzarmen honen helburua da Euskadik teknologia disruptiboetan edo berrietan dituen gaitasun zientifiko-teknologikoak indartzea, besteak beste, zibersegurtasunean, adimen artifizialean, robotikan eta konputazio kuantikoan. Elektronikak, energiak eta mekatronikak osatzen dituzte aipatutako lan-ildo nagusiak. Akordioak, gainera, talentua prestatu eta gaitzen laguntzen du, enpresa-sarearen erronka teknologikoak garatzeko eta, ondorioz, ikasleak lanean hasteko.

Hitzarmenak sendotu egin du zentro teknologikoak —50 urte bete ditu 2024an— eta euskal unibertsitate publikoak Bilboko Ingeniaritza Eskolaren, Gipuzkoako Ingeniaritza Eskolaren, Informatika Fakultatearen edo Zientzia eta Teknologia Fakultatearen bidez duten lankidetza estua. 2023an bakarrik, 35 ikaslek baino gehiagok jaso dituzte bi erakundeen arteko lankidetza horren abantailak.

Lankidetza-esparru horri esker, biderkatu egin daitezke unibertsitateak bultzatutako prestakuntzaren eta jakintza-sorkuntzaren arloko sinergiak, bai eta talentua eta teknologia zentro teknologikoak bultzatutako enpresa-sarera transferitzea ere. Ildo horretatik, IKERLANek UPV/EHUrekin lankidetza indartu nahi du bere ikasleak doktoretza-tesien, master-amaierako lanen eta gradu-amaierako lanen bidez prestatzeko. Ikasleak IKERLANeko espezializazio-taldeetan sartuko dira, nazioartean ospe handia duten ikertzaileekin batera.

Horrez gain, IKERLANek aukera ematen die ikasleei erakusleak, ekipamendua eta laborategietan lanean aritzeko, hala nola DIGILAB (Estatuko teknologia digitalak integratzeko lehen laborategia), ENERGYLAB edo MECHLAB, energiaren edo mekatronikaren arloko erronka teknologikoak konpontzeko. Unibertsitatea-Enpresa Gizartea UPV/EHU – IKERLAN ikaslegelak, beraz, diziplina anitzeko ikuspegi malgua du, eta, horren ondorioz, izaera  birtualeko lehen Unibertsitatea-Enpresa-Gizarte Ikasgela bihurtu da: hainbat egoitzatan egingo diguelako bere jarduerak, eta formatu dualeko praktikak barne hartzen dituzten jarduerak eta IKERLANeko nazioarteko laborategietan unibertsitarioen ikerketa sustatzen dituelako ere bai.

Era berean, UPV/EHUk aukera ematen dio IKERLANi ikaslearengana gehiago hurbiltzeko, eta aukera ematen dio masterra eta/edo gradua prestatzen parte hartzeko, interes komuneko saioak edo jardunaldiak antolatzeko, eta datozen urteetan industriak eta gizarteak izango dituzten erronkei lankidetzaz aurrea hartzeko sustatutako doktorego-tesiak gainbegiratzeko edo zuzentzeko. Halaber, funtsezkoa da katedrei eta tokiko hainbat proiekturi laguntzea. Horien artean daude Elkartek 2024 programari atxikitakoak. Elkartek 2024 Euskadiko Zientzia, Teknologia eta Berrikuntza Planaren (ZTBP 2030) esparruan, lankidetza-ikerketari laguntzea du helburu, eremu estrategikoetan, bai funtsezko ikerketan bai industria-ikerketan.

Unibertsitatea-Enpresa-Gizartea UPV/EHU - IKERLAN Ikasgelak ere lankidetza-prozesuak gidatu nahi ditu Europan. Une honetan Safe4rail3 proiektuaren parte da, trenbide-industriaren balio-handitzean oinarritua; izan ere, garraioa funtsezko azpiegitura da kontinenteko herritarrek bizi-kalitatea hobetzeko, hazkunde ekonomikoa, enpleguaren sorrera eta oparotasun orokorra bultzatzeaz gain.

Eva Ferreira Euskal Herriko Unibertsitateko errektoreak esan duenez, “Ikasgela honek unibertsitate publiko gisa gure misioa indartu eta sendotu egiten du, abangoardia zientifikoko arloetan kalitate bikaineko prestakuntza eskaintzeko, hala nola zibersegurtasunean, robotikan, adimen artifizialean edo konputazio kuantikoan. Horietan, ikerketa-talde finkatuak eta puntakoak ditugu, eta IKERLANen izen oneko enpresekin arrago sortzaile perfektua aurkitu dute, ikerketaren sustapen sinergikorako eta ezagutzaren transferentziarako”.

Ion Etxeberriak oso positibotzat jo du akordioa, eta nabarmendu du baliagarria izango dela “UPV/EHUrekin, nazioartean erreferentzia den unibertsitatearekin, duela zenbait urtetik garatzen ari ginen lankidetza indartzeko eta egituratzeko. Gure barne-langileak zaintzeko eta indartzeko estrategiaren barruan talentua erakartzeko aukera interesgarria da; gainera, gure enpresa-sarearen lehiakortasunerako funtsezkoak diren eta sinergiak funtsezkoak diren lan-esparru bateratuetako ikerketari bultzada bat da”.

IKERLANi buruz

IKERLAN zentro liderra da teknologiaren transferentzian eta industriari balio lehiakorra ematen. Soluzio integralak eskaintzen ditu hainbat domeinu teknologiko konbinatuz hiru arlo handitan: teknologia digitalak eta adimen artifiziala, sistema elektroniko txertatuak eta zibersegurtasuna, eta teknologia mekatronikoak eta energiaren esparrukoak. Gaur egun, 420 pertsonaz osatutako taldea dago, eta egoitzak Arrasaten, Donostialdean eta Bilbon ditu. MONDRAGON Korporazioko eta Basque Research and Technology Alliance (BRTA) erakundeko kide den kooperatiba gisa, IKERLAN enpresa-eredu jasangarria, lehiakorra eta etengabe aldatzen ari dena da. 2024an, IKERLANek 50 urte betetzen ditu, eta bere sorrerako helburuari eutsi dio: inguruko enpresen berrikuntza eta lehiakortasuna hobetzeko teknologia garatzea.

close overlay