• EHU, Mondragon Unibertsitatea, Deustu, EUNEIZ, DIGIPEN, Kantabriako Unibertsitatea eta Errioxako Unibertsitateko 200 ikaslek baino gehiagok parte hartu dute hacking etikoko eta segurtasun informatikoko probetan.
• Zibersegurtasunean espezializatutako profilen eskariak izugarri gora egin du Euskadin eta Estatuan, ingeniaritzarekin eta informatikarekin lotutako 9000 lanpostu baino gehiagorekin, eta Estatuan, berriz,  42 000 profesionalen defizita dago.

Zibererasoak ugaritu egin dira, eta, ondorioz, zibersegurtasuneko profesionalen eskaera handitu egin da. Hori dela eta, IKERLANek Euskadiko lehen unibertsitate lehiaketa bultzatu du, IK3RL4N Capture The Flag.  Ekitaldi honek ikaskuntza praktikoa eta talentua detektatzea uztartzen ditu goraldian dagoen sektorean. Azken asteetan 200 ikaslek baino gehiagok parte hartu duten kanporaketaren aurreko fasean, eta gaur, Bilboko “La Perrera” gunean ospatu da  lehiaketaren final handia.

Finalean, parte-hartzaileek hacking etikoari eta sistema informatikoen babesari lotutako erronkak konpondu behar izan dituzte denbora mugatuan. Horretarako, ahultasunak, kriptografia edo alderantzizko ingeniaritza aztertzeko teknikak praktikan jarri dituzte. Aldez aurretiko ezagutza teknikoez gain, talde-lana eta ikasteko gaitasuna ezinbestekoak izan dira final handi honetako hitzorduan.

“Digitalizazioak aukera handiak ireki ditu, baina baita mehatxu berriak ere. IKERLANen lekuko gara nola enpresek segurtasun gertakari posibleen aurrean blindatzeko duten beharra erritmo bizian hazten ari den. Horrek kualifikazio handiko profesionalak eskatzen ditu. Horrelako ekitaldiei esker, unibertsitateetara hurbil gaitezke, eta etorkizuneko ekonomian funtsezkoa izango den esparru batera erakar dezakegu talentua”, adierazi du David Gonzálezek, IKERLANeko Zibersegurtasun eta Fidagarritasun alorreko arduradunak.

IKERLANekin batera, ORBIK, SECURE&IT eta JAKINCODE bezalako enpresa laguntzaileek bat egin dute ekimen aitzindari honekin, eta parte hartze nabarmena izan dute talde finalisten sari ematean.  Salva Trujillok, ORBIKeko zuzendari nagusiak, "bokazio teknologiko berriak sustatu eta unibertsitateko ikasgeletara berrikuntza ekartzearen aldeko apustua egiten duten horrelako ekimenetan parte hartzearen garrantzia" azpimarratu du.

Ekimen hau IKERLANek unibertsitateko prestakuntzarekin eta talentuarekin duen konpromisoaren barruan sartzen da. 2024an, IKERLANek 48 artikulu zientifiko argitaratu zituen, horietatik 34 eragin handiko aldizkarietan, eta 47 patente eta erregistro berri erregistratu zituen. 55 doktore-tesi ere aktibo egon ziren, 11 berri hasita eta 6 amaituta. MONDRAGON UNIBERTSITATEArekin lankidetza estrategikoa izateaz gain, zentroak lankidetza sarea indartu zuen hainbat unibertsitaterekin, hala nola UPV/EHU, Kataluniako Unibertsitate Politeknikoa, Kantabriako Unibertsitatea eta Holandako Radboudeko Unibertsitatearekin, eta, hala, erreferentziazko agente ikertzaile gisa duen zeregina sendotu zuen.

Aktibo teknologikoen, patenteen, tesien eta IK3RL4N Capture  The Flag  bezalako ekitaldien bidez, IKERLANek ikerketa aplikatua unibertsitate-ingurunera hurbildu nahi du, eta funtsezko arloetan —zibersegurtasunean, adibidez— bokazioak piztu, Euskadin eta inguruan duen talentu teknologikoaren eragile gisa duen rola sendotuz.

IKERLAN, erreferentea zibersegurtasun industrialean

Zibersegurtasunak IKERLANen jardueraren zati estrategiko bat biltzen du, Orona, Cegasa, Ingeteam edo Laboral Kutxa bezalako ingurune industrial eta teknologikoetan bezero liderrentzat lan egiten duten 60 profesionalez osatutako talde batekin.

2024an, euskal zentro teknologikoaren zibersegurtasun industrialeko laborategia ENACek egiaztatutako Estatuko lehena bihurtu zen, automatizazio eta kontrol industrialeko sistemetan saiakuntzak egiteko. Mugarri aitzindaria izan da, eta Europan erreferente gisa duen posizioa indartu du, bereziki produktu elektroniko konektatuetara bideratuta. Horri ORBIK gehitu behar zaio, IKERLANek 2023an sortutako spin-off- a, eta Estatuan bakarra, arautegiak eskatu aurretik Europako fabrikatzaile industrialei beren produktuak ziberaseguru gisa ziurtatzen laguntzen espezializatua. Horrelako ekimenekin, zentroak bere lidergoa eta erronka digitalen aurrean industria seguruago, erresilienteago eta prestatuago batekiko konpromisoa berresten ditu.

Talentu-eskaera gero eta handiagoa duen sektorea

Zibererasoak % 48 hazi dira Euskadin azken bi urteetan, eta gero eta eragin handiagoa dute enpresa eta erakundeetan, azken urtean 50.000 mehatxu jaso baitzituzten, aurrekoan baino % 40 gehiago. Hilero, batez beste, software maltzurrarekin lotutako 3500 gertakari erregistratzen dira, eta gertakarien erdiak baino gehiago iruzur ekonomikoek eraginak dira, Cyberzaintzaren datuen arabera.

Aldi berean, zibersegurtasunean espezializatutako profilen eskaerak gora egiten jarraitzen du eten gabe. Euskadin, 3700 profesional baino gehiago behar dira informatikan, 1800 ingeniaritza industrialean eta 3600 arlo teknologikoari lotutako beste ingeniaritza batzuetan. Estatu mailan, eskaintza eta eskariaren arteko arrakala 42 000 pertsonatik gorakoa da, Europako Zibersegurtasun Agentziaren (ENISA) arabera.

Emakumeen presentzia handitzeko erronkari ere aurre egin behar dio sektoreak: STEAM karrerek ikasle gehiago badituzte ere, zibersegurtasunean graduatutako ikasleen % 18 baino ez dira emakumeak.

IKERLANi buruz

IKERLAN zentro liderra da teknologiaren transferentzian eta industriari balio lehiakorra ematen. Soluzio integralak eskaintzen ditu, hiru arlo handitan hainbat domeinu teknologiko konbinatuz: teknologia digitalak eta adimen artifiziala, sistema elektroniko txertatuak eta zibersegurtasuna, eta teknologia mekatronikoak eta energiaren alorrekoak. Gaur egun, 420 pertsonak osatzen dute taldea, eta Arrasaten, Donostialdean eta Bilbon ditu egoitzak. MONDRAGON eta Basque Research and Technology Alliance-ko (BRTA) kooperatiba kide den aldetik, IKERLAN enpresa-eredu jasangarria, lehiakorra eta etengabe eraldatzen ari dena da.

IKERLANek zibersegurtasun industrialaren eta gai horretan talentua prestatzearen aldeko apustua berretsi du.